Andlátsfregn

Guðlaugur Gunnarsson frá Svínafelli í Öræfum andaðist á hjúkrunarheimilinu þann 7. júní síðastliðinn.  Útför hans var gerð frá Hofskirkju þann 15.júní síðastliðinn. Guð blessi minningu hans.

Hvað var um að vera í prestakallinu í maí

Við erum svolitið seinir að birta hvað var um að vera í maí-mánuði en hér kemur það. Í maí var nóg um fermingar en fermd voru tíu börn í þremur athöfnum. Eitt andlát varð og eitt barn var skírt.

Andlát

  • Fjóla Aradóttir Borg á Mýrum.

 

Skírn

  • Klara Elísabet Foreldrar: Elmar Freyr og Stefnaie Raucheder

Sláttur er hafinn

Það veitir alltaf á gott þegar maður heyrir í slátturvélinni í kirkjugarðinum á Höfn, það er merki um að það sé komið sumar. Nú í dag var fyrsti sláttur í garðinum en hann kemur vel undan vetri. Fólk er hvatt til að hreinsa og snyrta leiði ástvina sinna eftir veturinn. Þess má geta að búið er að koma upp fiskikari fyrir garðaúrgang framan við garðinn þannig að það þarf ekki að taka hann með sér. Einnig er krani með rennandi vatni og garðkanna á staðnum þannig að auðvelt er vökva sumarblómin sem komið er fyrir á leiðunum. Gleðilegt sumar.

Myndasíðan

Alltaf má benda á það sem gott er og gaman. Prestakallið heldur úti myndasíðu á Flickr-síðunni, http://www.flickr.com/photos/bjarnanesprestakall. Margar og skemmtilegar myndir hafa ratað þangað og alltaf eru að bætast við myndir. Um er að ræða bæði gamlar og nýjar myndir úr starfi prestakallsins. Nýjustu myndirnar eru úr fermingum sem voru nú í vetur og vor. Ef þið lumið á gömlum myndum má senda þær á stigur.reynisson@kirkjan.is

Andlátsfregn

Fjóla Aradóttir frá Borg á Mýrum, síðar húsfreyja á Fossi á Síðu, andaðist á hjúkrunarheimilinu þann 2. maí síðastliðinn.  Útför hennar verður gerð frá Prestbakkakirkju á Síðu þann 11. maí kl. 14:00.  Guð blessi minningu hennar.

Hvað var um að vera í prestakallinu í apríl

Ekki er slegið slöku við hér í prestakallinu frekar en fyrri daginn. Ekki var samt alveg jafn mikið að gera þennan mánuðinn og í marsmánuði. Í prestakallinu voru 4 guðsþjónustur ásamt sunnudagaskóla. Ein stúlka var fermd í Hofskirkju á sumardaginn fyrsta. Blessunarlega varð ekkert andlát þennan mánuðinn, þökkum Guði fyrir það. Haldnir voru tveir aðalsafnaðarfundir, í Bjarnanessókn og Kálfafellsstaðarsókn. Á fundinum hjá Kálfafellsstaðarsókn var m.a. rætt og skoðað nýtt vegstæði að kirkjunni. Um miðjan mánuðinn var haldið samkirkjulegt námskeið. Um var að ræða námskeið sem var haldið vegna hátíðar sem haldin verður í haust í Reykjavík og ber nafnið Hátíð Vonar.

Skírð voru 3 börn:

  • Vilhelm
    Foreldrar: Fjóla Hrafnkelsdóttir og Vigfús Þórarinsson
  • Gerður Lilja
    Foreldrar: Helgi Ragnarsson og Hanna Dís Whitehead
  • Steinþór
    Foreldrar: Haukur Ingi Einarsson og Berglind Steinþórsdóttir

Hvað var um að vera í prestakallinu í mars

Nóg var um að vera í prestakallinu í marsmánuði. Fjöldinn allur af messum og öðrum athöfnum. Í öllu prestakallinu voru 12 guðsþjónustur, kyrrðarstundirnar voru fjórar og voru þær allar í Hafnarkirkju á miðvikudögum. Prestar prestakallsins sem og organisti tóku þátt í Skaftfellingamessu í Breiðholtskirkju á vegum Skaftfellingafélagsins þann 17. mars. Fermingar hófust þann 23. mars með einu barni en alls voru 18 börn fermd í fimm athöfnum í þremur kirkjum í prestakallinu. Engar hjónavígslur voru. Eitt andlát varð:

  • Helgi Halldór Árnason
    Setberg í Nesjum

Skírð voru fjögur börn:

  • Hafsteinn Þór
    Foreldrar: Sandra Lind og Hlynur
  • Auður Inga
    Foreldrar: Halldór Halldórsson og Bergþóra Ó. Ágústsdóttir
  • Elín Rós
    Foreldrar: Eymundur Ragnarsson og Birna Þ. Sæmundsdóttir
  • Sverrir Ketill
    Foreldrar: Gunnar Páll og Helga Guðbjörg

Organistar fá menningarverðlaun

Þann 13. mars sl. voru afhent menningarverðlaun Austur-Skaftafellssýslu. Eru verðlaunin veitt á hverju ári og eru þau veitt þeim sem hafa stutt við og/eða haft menningu sýslunnar í hávegum. Í ár var tveimur mönnum veitt verlaunin og það er gaman að segja frá því að báðir hafa þeir verið organistar í Bjarnanesprestakalli (áður Bjarnanesprestakall og Kálfafellsstaðarprestakall) og annar þeirra er enn starfandi.

Sigjón Bjarnason á Brekkubæ (f. 1931) hefur átt ríkan þátt í að glæða tónlistinni lífi í allri sýslunni. Hann hefur stjórnað ótal kórum og var einnig organisti í Bjarnaneskirkju í fjölda ára.

Sigurgeir Jónsson á Fagurhólsmýri (F. 1932) hefur verið ómissandi þáttur í menningar- og félagslífi Öræfinga. Hann hefur verið organisti í Hofskirkju í rúma tvo áratugi og er enn að, þar sem hann skiptir á milli orgelsins og harmonikkunnar í athöfnum eins og ekkert sé.

Við viðtöku verðlaunanna þökkuðu þeir fyrir og þakka Sigurgeir og tileinkaði þessum verðlaunum konu sinni, Guðmundu, og sagði að án hennar hefði hann aldrei komist upp með að sinna þessu áhugamáli sínu af eins miklum móð og hann hefur gert og gerir enn.

Bjarnanesprestakall óskar þeim báðum til hamingju með verðlaunin.

Andlátsfregn

Helgi Halldór Árnason frá Setbergi í Nesjum andaðist á hjúkrunarheimilinu þann 19. mars s.l.  Útför hans fór fram frá Hafnarkirkju mánudaginn 24. mars kl. 13:00 og hann hlaut leg í kirkjugarðinum við Laxá.  Helgi var 88 ára gamall þegar hann lést.  Guð blessi minningu hans.