Ólafsmessa 29.júlí 2020
Hin árlega Ólafsmessa verður haldin miðvikudagskvöldið 29.júlí kl 20. Verið öll velkomin í Kálfafellstaðarkirkju að hlusta á hugljúfa tónlist þar sem Þórdís Sævarsdóttir og Tara Mobee syngja á rólegum nótum valdar lagaperlur úr söngmöppum sínum við undirleik Vignis Þórs Stefánssonar.
Dagskráin hefst með stuttri helgistund sem sr. Ingimar Helgason leiðir. Einnig verður rifjuð upp sagan um völvuna á Kálfafellsstað og tengingar kirkjunnar við Ólaf helga Noregskonung. Tónleikarnir eru svo í beinu framhaldi og verða um klukkustund.
Að lokum er öllum boðið í gönguferð að völvuleiðinu undir Hellaklettum og rifjuð upp sagan af álögum völvunnar og áhrifum hennar á örlög og líf fólksins í Suðursveit í gegnum aldirnar ef veður leyfirTilvalið fyrir heimamenn að koma og njóta kvöldstundar í Kálfafellsstaðarkirkju og taka gesti með.
Aðgangur ókeypis. Allir velkomnir.
Viðburðurinn er unninn í nánu samstarfi við Þorbergssetur og er þeim bestu þakkir færðar.
![](http://bjarnanesprestakall.is/wp-content/uploads/2020/07/My-Post-1-2-1024x1024.png)
Um tónlistarfólkið
Tara Mobee er ung og upprennandi söngkona og lagahöfundur og þykir vænt um hornfirskar rætur sínar. Tara er menntuð frá Tónlistarskólanum í Kópavogi, auk fjölda söng- og tónlistarnámskeiða, m.a. upptökutækni og raftónlist. Tara nam hörpuleik fyrstu árin og hefur síðan þá nýtt píanó- og gítarleik í sinni tónlistarsköpun, ásamt fleiri strengjahljóðfæri. Tara vakti snemma athygli fyrir tón- og lagasmíðar sínar og hefur gefið út eigin lög frá 16 ára aldri, eftir að hún sigraði söngvakeppni Kópavogs með frumsömdu lagi sínu ,,With you“. Tara tók þátt í Eurovision 2019 með laginu ,,Betri án þín“ og átti þar góðu gengi að fagna auk þess sem hún hefur gefið út eigin lög á íslandi, verið í 4 sæti íslenska vinsældarlistans og er í erlendu tónlistarsamstarfi í Sviss og Bandaríkjunum.
![](http://bjarnanesprestakall.is/wp-content/uploads/2020/07/Tara-Mobee-1024x679.jpg)
Þórdís Sævarsdóttir söngkona, kórstjóri og verkefnastjóri er menntuð frá Tónlistarskólanum í Reykjavík, FÍH, Complete Vocal Technique og Tónskóla Þjóðkirkjunnar auk þess að vera MA í Menningarstjórnun. Þórdís hefur starfað sem sóló-söngkona samhliða öðrum verkefnum, sungið með fjölda sönghópa, haldið tónleika, tekið að sér bakraddasöng á geislaplötum og verið viðburða- og verkefnastjóri á sviði lista, fræðslu og menningar.
![](http://bjarnanesprestakall.is/wp-content/uploads/2020/07/Þórdís-Sævars-002.jpg)
Vignir Þór Stefánsson píanóleikari er menntaður tónmenntakennari frá Tónlistarskólanum í Reykjavík og með mastersgráðu í djasspíanóleik frá Konunglega Tónlistarháskólanum í Haag í Hollandi. Hann hefur verið virkur í íslensku tónlistarlífi og leikið sem píanó – og hljómborðsleikari með söngvurum, sönghópum og kórum og hljómsveitum af öllum stærðum og gerðum. Hann hefur komið fram á geislaplötum og í sjónvarpi og leikið á hljómborð í fjölmörgum söngleikjum sem sýndir hafa verið í stærstu leikhúsum landsins.
![](http://bjarnanesprestakall.is/wp-content/uploads/2020/07/vignir-portrettmynd-1-768x1024.jpg)