Þann 26. ágúst var haldið uppá 150 ára vígsluafmæli Stafafellskirkju í Lóni. Þétt var setið í kirkjunni á þessum fallega sunnudegi þar sem prestarnir sr. Gunnar Stígur og sr. María Rut þjónuðu fyrir altari og nývígður vígslubiskup Kristján Björnsson predikaði. Hér fyrir neðan má sjá myndir úr messunni sem og kaffinu sem haldið var að messu lokinni í Mánagarði. Hægt er að sjá myndirnar stærri með því að smella á þær.
Þann 10. október mun hefjast í Hafnarkirkju fimm vikna námskeið fyrir 6-9 ára börn. Umsjónarmenn eru prestarnir Stígur og María og er stefnt að því að vera með allskonar glens og gaman á meðan námskeiðinu stendur en dagskráin mun svo verða auglýst síðar.
Frekar upplýsinar og skráning má finna hér!
Mánudaginn 24. september kl.18 verður kynning á Alfa. Kynningin verður haldin í samkomuhúsi Hvítasunnukirkjunnar Lifandi vatn.
Boðið verður upp á súpu gestum að kostnaðarlausu
Hvað er Alfa?
Alfa er 10 vikna námskeið um kristna trú. Fjallað er á einfaldan og þægilegan hátt um grundvallaratriði kristinnar trúar og boðskap Biblíunnar. Með virkri þátttöku námskeiðsgesta er leitast við að svara mikilvægustu spurningum lífsins, spurningum sem allir spyrja sig einhvern tímann á lífsleiðinni en hafa kannski ekki náð að svara fyrir sitt leyti.
Námskeiðið er að jafnaði haldið einu sinni í viku. Hvert kvöld hefst á léttum kvöldverði kl. 18. Síðan er kennsla í um 30 mínútur og svo eru umræður í litlum hópum. Eftir umræður hefst lofgjörðar- og fyrirbænastund.
Alfa námskeiðið er opið fyrir alla. Ekkert þátttökugjald er á Alfa, þ.e. fyrir námskeiðið sjálft og fyrirlestrana. Greitt er fyrir matinn í hvert sinn.
umsjón með Alfa námskeiðinu verða prestar Bjarnaprestakalls og einnig frá Hvítasunnukirkjunni Lifandi vatn.
Verið hjartanlega velkomin. 
Hægt er að gera margt í því sem maður ræðir og tekst á við, en ekkert í því sem maður bælir og horfist ekki í augu við.
Leiðbeinandi í vetur er Sveinbjörg Jónsdóttir djáknakandídat. Ef einhverjar spurningar vakna er sjálfsagt að hafa samband við Sveinbjörgu í síma 8692364.
Nú fer fermingarfræðsla að byrja í Bjarnanesprestakalli og þegar hefur verið haldinn fundur með foreldrum og væntanlegum fermingarbörnum. Eitthvað hefur staðið á sér að skrá sig í fræðsluna og því bendum við prestarnir á skráningarsíðuna. Hægt er að komast inn í hana með því að smella hér.
Við vinnum svo einnig foreldra og væntanleg fermingarbörn að skrá sig í Facebook hóp fræðslunnar sem er Fermingarfræðsla í Hafnarkirkju og einnig líka við síðu Bjarnanesprestakalls
Þann 26. ágúst kl. 14:00 verður hátíðarmessa í Stafafellskirkju þar sem því verður fagnað að 150 ár eru frá vígslu kirkjunnar.
Það er gaman að segja frá því að nýr vígslubiskup Skálholtsumdæmis sr. Kristján Björnsson mun heiðra okkur með nærveru sinni. Einnig hafa fyrrum prestar Stafafellskirkju boðað komu sína.
Að messu lokinni verður boðið til kaffisamsætis í Mánagarði þar sem fólki gefst kostur til að eiga gott samfélag yfir kaffi og öðrum kræsingum
Allir eru að sjálfsögu velkomnir og eru allir hvattir til að mæta.
Atburðurinn verður auglýstur nánar síðar
Hreinnn Eiríksson er fallin frá. Hann lést á hjúkrunarheimilinu Skjólgarði 10. júlí sl.
Hreinn er mörgum góðum kunnur meðal annars fyrir sín fjölmörgu félagsstörf. Hreinn sat til að mynda í sóknarnefnd Bjarnanessóknar í tugi ára. Það var ekki fyrr en fyrir tveimur árum að hann ákvað að láta staðar numið en var þó alla tíð duglegur að sækja kirkju sína. En hann tók þátt í að byggja Bjarnaneskirkju og sinnti henni ætíð vel og kirkjugörðunum einnig.
Sóknarnefnd Bjarnanessóknar þakka Hreini fyrir allt hans óeigingjarnastarf og votta aðstandendum samúð sína.
Á myndinni hér fyrir ofan má sjá Hrein ásamt sóknarnefnd Bjarnanessóknar árið 2016.
Tímamót urðu nýlega þegar nýr kirkjuvörður var ráðinn við Hafnarsókn. Í rúm 20 ár hefur Örn “Brói” Arnarson sinnt því starfi af miklum heilindum og natni. Í lok ágúst mun hann láta af störfum og við tekur Sindri Bessason en hann er giftur Jóhönnu Íris Ingólfsdóttur (dóttir Vopna og Birnu). Þó erfitt verði að feta í fótspor Bróa þá hefur sóknarnefnd, prestar og organisti mikla trú á því að samstarfið muni ganga vel þeirra á milli og eins við sóknarbörn Hafnarsóknar.
Síðasta athöfnin sem Brói mun koma að sem kirkjuvörður verður hátíðarmessa vegna 150 ára afmælis Stafafellskirkju.
Hin árlega Ólafsmessa verður haldin 29. júlí næstkomandi í Kálfafellsstaðarkirkju í tilefni af Ólafsmessu að sumri og hefst dagskráin kl. 20:00. Viðburðurinn er unninn í nánu samstarfi við Þorbergssetur og er þeim bestu þakkir færðar.
Svavar Knútur söngvaskáld sækir Suðursveit heim að þessu sinni og má búast góðu og skemmtilegu kvöldi þar sem Svavar er þekktur fyrir góða tónlist og skemmtilegar frásagnir.
Dagskráin hefst með stuttri helgistund þar sem sr. Gunnar Stígur Reynisson verður við altarið. Síðan verður rifjuð upp sagan um völvuna á Kálfafellsstað og tengingar kirkjunnar við Ólaf helga Noregskonung. Tónleikarnir eru svo í beinu framhaldi og verða um klukkustund. Að lokum er öllum boðið í gönguferð að völvuleiðinu undir Hellaklettum og rifjuð upp sagan af álögum völvunnar og áhrifum hennar á örlög og líf fólksins í Suðursveit í gegnum aldirnar.
Tilvalið fyrir heimamenn að koma og njóta kvöldstundar í Kálfafellsstaðarkirkju og taka gesti með.
Aðgangur ókeypis.
Allir velkomnir
