Category Archives: Bjarnanessókn

Vinir í bata

Miðvikudaginn 19. september hefst 12 spora starf í Hafnarkirkju. Starfið er frá 17:00 – 19:00. Um er að ræða 12 spora starf sem kallast „Vinir í bata“. Sporastarf þetta er fyrir alla og er hugsað til að horfa innávið frá æsku til dagsins í dag með það í huga eiga gott líf, skoða orsakir og afleiðingar í þeim tilgangi að vinna bug á erfiðleikum eða neikvæðu lífsmunstri.

Hægt er að gera margt í því sem maður ræðir og tekst á við, en ekkert í því sem maður bælir og horfist ekki í augu við.

Leiðbeinandi í vetur er Sveinbjörg Jónsdóttir djáknakandídat. Ef einhverjar spurningar vakna er sjálfsagt að hafa samband við Sveinbjörgu í síma 8692364.

Skráning í fermingarfræðslu

Nú fer fermingarfræðsla að byrja í Bjarnanesprestakalli og þegar hefur verið haldinn fundur með foreldrum og væntanlegum fermingarbörnum. Eitthvað hefur staðið á sér að skrá sig í fræðsluna og því bendum við prestarnir á skráningarsíðuna. Hægt er að komast inn í hana með því að smella hér.

Við vinnum svo einnig foreldra og væntanleg fermingarbörn að skrá sig í Facebook hóp fræðslunnar sem er Fermingarfræðsla í Hafnarkirkju og einnig líka við síðu Bjarnanesprestakalls

Hreinn Eiríksson fallinn frá

Hreinnn Eiríksson er fallin frá. Hann lést á hjúkrunarheimilinu Skjólgarði 10. júlí sl.

Hreinn er mörgum góðum kunnur meðal annars fyrir sín fjölmörgu félagsstörf. Hreinn sat til að mynda í sóknarnefnd Bjarnanessóknar í tugi ára. Það var ekki fyrr en fyrir tveimur árum að hann ákvað að láta staðar numið en var þó alla tíð duglegur að sækja kirkju sína. En hann tók þátt í að byggja Bjarnaneskirkju og sinnti henni ætíð vel og kirkjugörðunum einnig.

Sóknarnefnd Bjarnanessóknar þakka Hreini fyrir allt hans óeigingjarnastarf og votta aðstandendum samúð sína.

Á myndinni hér fyrir ofan má sjá Hrein ásamt sóknarnefnd Bjarnanessóknar árið 2016.

Fermingarbörn 2018

Í vetur hefur hópur tæplega 20 ungmenna sótt fermingarfræðslu í Hafnarkirkju og hefur oft verið kátt á hjalla. Farið var m.a. í fermingarferð í Öræfin þar sem góður tími gafst í fræðslu og leik.

Í ár verða fermingardaga ekki svo ýkja margir. Í Hafnarkirkju verða þeir tveir auk einnar sumarfermingar. Að auki verður fermt í Brunnhólskirkju, Hoffellskirkju og Hofskirkju.

Hér fyrir neðan má sjá lista með nöfnum fermingarbarna og hvað dag þau munu fermast. Smellið á myndina til að sjá hana stærri.

Hvað gerðist í Bjarnanesprestakalli á árinu 2017. Árið í tölum

Nú er árið 2017 á enda og því er gott tilefni að horfa yfir farinn veg. Hvernig var árið 2017 í Bjarnanesprestakalli? Það er ekki hægt að segja annað en nóg hafi verið um að vera og var m.a. nýr prestur skipaður, María Rut Baldursdóttir. Kálfafellsstaðarkirkja fagnaði stórafmæli með messu á Ólafsmessu 29. júlí þar sem kirkjunni var færð gjöf í formi moldarkers (fósturjarðartrogs).

Messur voru reglulega yfir allt árið en alla jafna voru þær á hálfsmánaðarfresti. Hafnarkirkja var vel nýtt til ýmissa starfa, þ.á.m. kórastarf, foreldramorgna og félagsstarfa.

Kirkjulegar athafnir (frátöldum messum) voru með mesta móti á árinu þó ekki hafi tekist að slá árinu 2016 við. Hér fyrir neðan má sjá tölulegt yfirlit yfir þá viðburði.

  • Skírnir: 17
  • Hjónavígslur: 7
  • Útfarir: 20
  • Fermingar: 24 (börn)

Eins og sjá má voru útfarir margar en þó aðeins færri en árinu áður.. Það er þó gleðilegt að skírir voru næstum því á pari við árið 2016 en þá voru 19 börn skírð.

Hægt er að bera saman fleiri tölur frá árinu áður með því að smella hér.

Þess má geta að hér er ekki um tæmandi lista að ræða því aðeins er farið í kirkjubækur prestakallsins. Athafnir eins og endurnýjun hjúskaparheita kemur ekki hér fram né athafnir sem framkvæmdar voru af öðrum prestum.

Jólahelgihald í Bjarnanesprestakalli

Það er ekki hægt að segja annað en að allir ættu að geta farið í messu þessi jólin. Messað verður í öllum sjö kirkjum prestakallsins auk Skjólgarðs.

Fólk er vinsamlegast beðið að taka eftir tveimur nýungum. Barnastund verður á Aðfangadag kl. 12:00 þar sem krakkar geta komið og átt góða stund í kirkjunni á meðan beðið er eftir jólunum. Einnig hefur aftansöngur á Gamlársdag verður færður fram um eina klukkustund eða til kl. 17:00.

Annars má sjá alla messutíma hér fyrir neðan

Altaristafla sett upp í Bjarnaneskirkju – mynd

Nánast frá því að Bjarnaneskirkja var byggð hefur það verið í umræðunni að setja upp altaristöfluna sem var áður í gömlu kirkjunni við Laxá. Taflan er máluð af listamanninum Jóni Þorleifssyni frá Hólum og minnast margir töflunnar með hlýhug. Vegna hönnunar á Bjarnaneskirkju var ekki unnt að koma töflunni fyrir og var hún sett fremst í kirkjuskipið þar sem hún naut sín engan veginn.

Það var svo fyrir stuttu síðan sem skriður komst á málið og smíðuð var grind sem myndirnar voru hengdar upp á. Grindin var svo boltuð í vegginn og sjást engar festingar og virðist því myndin hanga í lausu lofti. Heppnaðist þetta einkar vel og er gerður góður almennur rómur af uppsetningunni.

Það var því afskaplega viðeigandi að fyrsta athöfnin eftir að taflan var sett upp var útför Halldóru Hjaltadóttur, en Jón var frændi Halldóru.

Fólki mun gefast næst tækifæri að virða fyrir sér töfluna á jóladag kl. 14:00 en þá verður hátíðarmessa í Bjarnaneskirkju.

Smellið á myndina til að sjá hana stærri