Category Archives: Fréttir

Fréttir, Hafnarsókn

Starf kirkjuvarðar í Hafnarsókn auglýst

Sóknarnefnd Hafnarsóknar auglýsir eftir kirkjuverði við Hafnarkirkju og Stafellskirkju í 75% starf.

Um er að ræða krefjandi, skemmtilegt og metnaðarfullt framtíðarstarf.

Í starfinu felst m.a. dagleg umsjón með kirkjum og kirkjugörðum (ekki sláttur), móttaka gesta, bókanir o.fl.  Sömuleiðis þátttaka í helgihaldi og safnaðarstarfi (meðhjálpari), létt viðhaldsvinna, umhirða, ræsting og þrif ásamt öðru samkvæmt starfslýsingu.

Sérstök áhersla er lögð á færni í mannlegum samskiptum,  lipurð og sveigjanleika ásamt að búa yfir ríkri þjónustulund.

Óskað er eftir því að umsækjendur geri skriflega grein fyrir menntun, starfsferli og öðru því sem  þeir óska að taka fram.  Umsækjendur skulu hafa óflekkað mannorð og vera tilbúnir að veita samþykki fyrir öflun upplýsinga úr sakaskrá í samræmi við siðareglur þjóðkirkjunnar.

Æskilegt að viðkomandi geti hafið störf fyrir 1. september en er ekki skilyrði.

Nánari upplýsingar um starfið veitir Albert Eymundsson formaður sóknarnefndar á netfanginu albert.eymundsson@gmail.com eða í síma 862-0249.

Umsóknarfrestur er til 15. maí.

Öllum umsóknum verður svarað.

Umsókn sendist til:
Sóknarnefndar Hafnarsóknar
b.t. Alberts Eymundssonar
Vesturbraut 25
780 Höfn

Sóknarnefnd Hafnarsóknar

Bjarnanessókn, Brunnhólssókn, Fréttir, Hafnarsókn, Hofssókn, Kálfafellsstaðarsókn

Fermingarbörn 2018

Í vetur hefur hópur tæplega 20 ungmenna sótt fermingarfræðslu í Hafnarkirkju og hefur oft verið kátt á hjalla. Farið var m.a. í fermingarferð í Öræfin þar sem góður tími gafst í fræðslu og leik.

Í ár verða fermingardaga ekki svo ýkja margir. Í Hafnarkirkju verða þeir tveir auk einnar sumarfermingar. Að auki verður fermt í Brunnhólskirkju, Hoffellskirkju og Hofskirkju.

Hér fyrir neðan má sjá lista með nöfnum fermingarbarna og hvað dag þau munu fermast. Smellið á myndina til að sjá hana stærri.

Fréttir, Hafnarsókn

Sóknartíðindi

Árið 2005 var gefið út fréttabréf Hafnarsóknar og fékk það nafnið Sóknartíðindi. Var fréttabréfið aðeins gefið út einu sinni og hefur það ekki verið fáanlegt fyrr en nú þegar því var komið á rafrænt form. Hægt er að skoða blaðið á heimasíðunni Issuu eða með því að smella hér.

Fréttir, Hafnarsókn

Kyrrðarstundir á föstu

Kyrrðarstundir á föstu á hverjum fimmtudegi kl. 18:15

Fastan hefst á öskudegi, miðvikudaginn 14. febrúar. Líkt og undanfarin ár verða kyrrðastundir í Hafnarkirkju í 7 vikur á föstunni. Helgihald í kirkjunni á föstu verður með svipuðu sniði og áður.  Auk hefðbundinnar guðsþjónustu annan hvern sunnudag verður kyrrðarstund hvern fimmtudag fram að páskum.  Stundin hefst kl. 18:15.  Þar verður lesið úr píslarsögu Jesú, Passíusálmar Hallgríms Péturssinar lesnir, sungnir sálmar og beðnar bænir.  Beðið verður sérstaklega fyrir sjúkum og þeim sem minna mega sín og taka prestarnir á móti sérstökum bænarefnum sem fólk vill að borin verði fram. Hægt er að senda bænarefni í tölvupósti til prestanna á netfangið bjarnanesprestakall@bjarnanesprestakall.is

Fastan á að minna okkur á þá 40 daga sem Jesús fastaði í eyðimörkinni. Fastan miðar að dauða Jesú og er undirbúningstími kristinna safnaða og að þeir íhugi þá atburði sem leiddu til aftöku Jesú á föstudeginum langa.  Í sjö vikur fyrir páska íhuga kristnir menn þessa atburði.  Fastan hefur ekki lengur þann sess í hugum fólks sem hún hafði áður fyrr, þegar t.d. var ekki borðað kjöt frá öskudegi til páskadags.  Fastan er tími íhugunar og iðrunar og hefur þess mátt sjá stað í kristinni kirkju um aldir.  Helgihaldið í kirkjunni ber merki þeirra atburða sem urðu í lífi Jesú Krists sem leiddu til dauða hans á krossi. Litur föstunnar, sjövikna föstu, langaföstu er fjólublár, litur iðrunarinnar.

Við hvetjum ykkur til að koma til kirkju á fimmtudögum fram að páskum og nota föstutímann til íhugunar, uppbyggingar og trúarstyrkingar.

Verið velkomin

Prestarnir.

Fréttir, Hafnarsókn

Umhverfisvænn foreldramorgun

Fimmtudaginn 15. febrúar mun Guðrún Ásdís kynna foreldrum fyrir umhverfisvænum bleyjum.

Um er að ræða hluta kynningu sem hafa verið og verða reglulega í foreldramorgnum í vetur.

Hittingurinn byrjar kl. 10:00 en Guðrún Ásdís mun hefja kynninguna kl. 10:30

Sjá nánar hér á auglýsingunni fyrir neðan.

Smellið á myndina til að sjá hana stærri
Bjarnanessókn, Brunnhólssókn, Fréttir, Hafnarsókn, Hofssókn, Kálfafellsstaðarsókn

Hvað gerðist í Bjarnanesprestakalli á árinu 2017. Árið í tölum

Nú er árið 2017 á enda og því er gott tilefni að horfa yfir farinn veg. Hvernig var árið 2017 í Bjarnanesprestakalli? Það er ekki hægt að segja annað en nóg hafi verið um að vera og var m.a. nýr prestur skipaður, María Rut Baldursdóttir. Kálfafellsstaðarkirkja fagnaði stórafmæli með messu á Ólafsmessu 29. júlí þar sem kirkjunni var færð gjöf í formi moldarkers (fósturjarðartrogs).

Messur voru reglulega yfir allt árið en alla jafna voru þær á hálfsmánaðarfresti. Hafnarkirkja var vel nýtt til ýmissa starfa, þ.á.m. kórastarf, foreldramorgna og félagsstarfa.

Kirkjulegar athafnir (frátöldum messum) voru með mesta móti á árinu þó ekki hafi tekist að slá árinu 2016 við. Hér fyrir neðan má sjá tölulegt yfirlit yfir þá viðburði.

  • Skírnir: 17
  • Hjónavígslur: 7
  • Útfarir: 20
  • Fermingar: 24 (börn)

Eins og sjá má voru útfarir margar en þó aðeins færri en árinu áður.. Það er þó gleðilegt að skírir voru næstum því á pari við árið 2016 en þá voru 19 börn skírð.

Hægt er að bera saman fleiri tölur frá árinu áður með því að smella hér.

Þess má geta að hér er ekki um tæmandi lista að ræða því aðeins er farið í kirkjubækur prestakallsins. Athafnir eins og endurnýjun hjúskaparheita kemur ekki hér fram né athafnir sem framkvæmdar voru af öðrum prestum.

Bjarnanessókn, Brunnhólssókn, Fréttir, Hafnarsókn, Hofssókn, Kálfafellsstaðarsókn

Jólahelgihald í Bjarnanesprestakalli

Það er ekki hægt að segja annað en að allir ættu að geta farið í messu þessi jólin. Messað verður í öllum sjö kirkjum prestakallsins auk Skjólgarðs.

Fólk er vinsamlegast beðið að taka eftir tveimur nýungum. Barnastund verður á Aðfangadag kl. 12:00 þar sem krakkar geta komið og átt góða stund í kirkjunni á meðan beðið er eftir jólunum. Einnig hefur aftansöngur á Gamlársdag verður færður fram um eina klukkustund eða til kl. 17:00.

Annars má sjá alla messutíma hér fyrir neðan