Ástin, dauðinn og drekinn í Hafnarkirkju

Í tilefni af 50 ára afmæli Hafnarkirkju og 40 ára afmæli Bjarnaneskirkju bjóða sóknarnefndir kirknanna Hornfirðingum og öðrum nærsveitungum frábært tækifæri að koma og hlusta á Vilborgu Davíðsdóttur.

Á síðustu þremur árum hefur Vilborg Davíðsdóttir rithöfundur og þjóðfræðingur kvatt eiginmann sinn, tengdamóður, föður og litla dótturdóttur. Bók hennar, Ástin, drekinn og dauðinn, sem kom út í fyrra, hefur vakið mikla athygli og hlotið lof fyrir að fjalla um ástvinamissi og sorg á áhrifamikinn en um leið jarðbundinn hátt. Þar lýsir hún vegferð sinni og Hennar heittelskaða með sjúkdómi sem þau vissu að myndi draga hann til dauða og fyrsta árinu eftir að hún varð ekkja. Hún veitir þar í senn innsýn í veröld krabbameinsins og djúpa sorg þess sem hefur elskað og misst. En bókin er ekki síður óður til kærleikans, hvatning til að lifa í árvekni og sættast við að dauðinn er órjúfanlegur hluti af lífinu.

Miðvikudagskvöldið 30. mars mun Vilborg flytja erindi í Hafnarkirkju um hvernig dauðinn breytir tilveru þeirra sem eftir lifa og hvernig þetta ferðalag hefur kennt henni að það eru einmitt þrautirnar í lífinu sem gera það að ævintýri.

Erindi Vilborgar í Hafnarkirkju hefst kl. 20:00 og eru allir velkomnir.