Category Archives: Hafnarsókn

Bjarnanessókn, Brunnhólssókn, Fréttir, Hafnarsókn, Hofssókn, Kálfafellsstaðarsókn

Söfnun fyrir vatnsverkefnum í Afríku

Prestar og fermingarbörn þökkum kærlega fyrir móttökurnar sem við fengum í gærkvöldi, 8. nóv., þegar gengið var í hús til að safna fyrir vatnsverkefnum í Afríku. Söfnunin er skipulögð af Hjálparstarfi kirkjunnar og taka öll fermingarbörn landsins þátt í söfnuninni á hverju ári. Í ár gekk söfnunin vel og er alveg ljóst að hún er orðin að hefð hjá fermingarbörnum hér í prestakallinu. Því miður komumst við ekki í allar götur á Höfn og komumst ekki heldur í Nesjahverfið eða sveitirnar þar sem árgangur fermingarbarnanna er í minni kantinum þetta árið, því miður.

Þeir sem vilja styrkja verkefnið er bent á heimasíðu Hjálparstarfsins, http://www.help.is

Hér fyrir neðan má svo sjá myndir af hluta fermingarbarnanna sem komu sæl og rjóð í kinnum eftir söfnunina.

Fréttir, Hafnarsókn

Allra heilagra messa 1. nóvember

Miðvikudaginn 1. nóvember
Helgistund kl. 20:00.
Látinna minnst í tali og tónum.
Hægt að kveikja á kertum til að minnast látinna.

Allra heilagra messa er 1. nóvember. Hún á sér fornar rætur því vitað er til að messur þar sem beðið var fyrir látnum voru haldnar þegar á 4. öld eftir Krist.

Allra heilagra messa varð snemma einn af helgustu messudögum íslensku kirkjunnar og var ekki afnumin í þeirri mynd fyrr en árið 1770, eða rúmum 200 árum eftir upphaf siðaskipta.

Þetta er messudagur þeirra heilagra manna sem ekki hafa sérstakan
messudag. Allra heilagra messa er í sívaxandi mæli að verða minningardagur um þau sem gengin eru á undan okkur.

Að þessu sinni verður allra heilagra messu minnst miðvikudagskvöldið 1. nóvember með helgistund í Hafnarkirkju kl. 20:00.  Guðsþjónustan er sérstaklega helguð minningu látinna og einkum þeirra sem látist hafa á undangengnu ári.

Aðstandendum og öllum þeim sem misst hafa er boðið að koma og eiga friðsæla, íhugunar-, bæna- og minningastund.

Í messunni verður fjallað um merkingu þessa helgidags.  Þá verður
sérstaklega beðið fyrir þeim sem létust síðastliðið ár og nöfn þeirra nefnd. Ef  óskað er eftir að aðrir sem látnir eru verði nefndir og sérstaklega beðið fyrir þeim er það auðvitað velkomið.

Beiðnum um það má koma til sr. Stígs í síma 862 6567 eða sr. Maríu í síma 823 5121, eða á netfangið
bjarnanesprestakall@bjarnanesprestakall.is

Fréttir, Hafnarsókn

Bleik Hafnarkirkja í bleikum október

Í ár rétt eins og síðustu ár hefur Hafnarkirkja verið lýst bleikum lit nú í oktober. Er þetta í tilefni átaksins Bleika slaufan sem stendur nú yfir.

Bleika slaufan er tákn krabbameinsfélagsins í baráttunni gegn krabbameini í konum. Árið 2000 var átakinu hleypt af stokkunum hérlendis og hafa sóknir um allt land verið að bætast í hópinn og sýnt átakinu stuðning í verki með því að lýsa upp kirkjur sínar.

Bryddað var upp á nýung í ár með bleikri messu. Félagar úr Krabbameinsfélagi Suðausturlands fluttu hugvekju og lásu bænir. Eftir messuna var kaffi í safnaðarheimilinu og hægt var að leggja inn frjáls framlög.

Messan tókst með ágætum og standa vonir til að þetta verði að árlegum viðburði.

Fréttir, Hafnarsókn

Bleik messa

Á sunnudaginn 22. október kl. 17:00 verður svokölluð Bleik messa í Hafnarkirkju vegna bleiks mánaðar. Félagar úr Krabbameinsfélagi Suðausturlands taka þátt í messunni og mun Þórhildur G. Kristjánsdóttir flytja reynslusögu.

Kaffi og kruðerí eftir messu og tekið er við frjálsum framlögum til Krabbameinsfélags Suðausturlands.

Allir eru kvattir til að koma í bleiku.

 

Bjarnanessókn, Brunnhólssókn, Fréttir, Hafnarsókn, Hofssókn, Kálfafellsstaðarsókn

Ekkert barn útundan

Hjálparstarf kirkjunnar styður efnalitlar fjölskyldur í upphafi skólaárs.

Skólataska, vetrarfatnaður, skór og stígvél, allt kostar þetta peninga svo ekki sé minnst á útgjöld vegna íþrótta- og tómstundastarfs sem falla til á haustin sem og kostnað vegna námsgagna þar sem greiða þarf fyrir þau.

Foreldrar grunnskólabarna sem búa við kröpp kjör geta leitað stuðnings hjá Hjálparstarfinu við að útbúa börnin í skólann. Hjálparstarfið er á Háaleitisbraut númer 66, neðri hæð Grensáskirkju. Það er opið frá 8 – 16 á virkum dögum.

Í fyrrahaust fengu foreldrar um 200 barna aðstoð hjá hjálparstarfinu og er búist við svipuðum fjölda umsókna um stuðning nú. Efnaleysi á ekki að hindra börn í námi eða í íþrótta- og frístundastarfi með jafnöldrum sínum.  Öll börn eiga að geta hlakkað til að byrja í skóla.

Nú er safnað fyrir verkefninu og hefur verið stofnaður valgreiðslukrafa með skýringunni Styrkur í heimabanka landsmanna að uphæð 2.600 krónur en einnig er hægt að senda sms í símanúmerið 1900 með textanum Styrkur og þá gjaldfærast 1.300 krónur af næsta símreikningi.

Fréttir, Hafnarsókn, Hofssókn

Messur á hvítasunnudag

Tvær messur verða á hvítasunnudag. Hátíðarmessa verður í Hafnarkirkju kl. 11:00 þar sem fjögur börn verða fermd og svo verður hátíðarmessa í Hofskirkju í Öræfum kl. 14:30 þar sem eitt barn verður fermt, sem og eitt barn skírt.

Það eru auðvitað allir velkomnir í þessar athafnir og er fólk hvatt til að mæta.

Fréttir, Hafnarsókn

Dagur aldraðra á uppstigningardegi

Uppstigningardagur verður haldinn á fimmtudaginn og um leið haldið upp á dag aldraðra um allt land. Í tilefni þess verður Guðsþjónusta á hjúkrunar- og dvalarheimilinu Skjólgarði. Í guðsþjónustunni munu Gleðigjafa, kór eldri borgara, synga sálma og ritningarlestur og hugleiðing verður einnigí höndum eldri borgara. Aðstandendur íbúa Skjólgarðs eru hvattir til að mæta.