Hafnarkirkja

v/ Kirkjubraut
780 Hornafjörður
S: 478 – 1425

Fyrstu skráðu umræður um kirkjubyggingu á Höfn var hjá kvenfélaginu Tíbrá árið 1944. Höfn var þá hluti af Bjarnanessókn og var það allt til 1953 þegar Hafnarsókn var stofnuð. Áður en Hafnarkirkja var reist hafði Hafnarsókn afnot af (gömlu) Bjarnaneskirkju við Laxá. Fljótlega var farið að huga að kirkjubyggingu. Bygging kirkjunnar dróst þó og þar var ekki fyrr en 1961 sem markvisst var farið í að byggð yrði kirkja á Höfn. Það var svo í júlí 1962 sem byrjað var á byggingu Hafnarkirkju Bygging kirkjunnar stóð til 1966 og var hún vígð 28. júlí sama ár. Byggingameistari var Guðmundur Jónsson og arkitekt var Ragnar Emils, en hann hefur m.a. einnig teiknað Mosfellskirkju. Kirkjuskipið rúmar um 200 manns í sæti og til hliðar við það er salur þar sem ýmiss konar kirkjutengd starfssemi fer fram. Skírnarfonturinn í kirkjunni er skorinn af listamanninum Jóhanni Björnssyni og var hann gefinn kirkjunni til minningar um þá sem fórumst með MB. Sigurfara í Hornafjarðarósi árið 1971. Skálina í fontinum er smíðuð af Hreini Jóhannssyni. Steindu gluggarnir í kirkjunni er gerðir af þýskum listamanni, Maríu Katzgrau(d. 1998).

Pípuorgelið i kirkjunni var smíðað hjá P. Bruhn og son í Danmörku og sett upp í kirkjunni árið 1996.

Kirkjugarðurinn er fyrir framan kirkjuna og var hann vígður árið 1959. Vökumaður garðsins er Guðni “vert” Jónsson. Garðurinn var stækkaður árið 1997 og vökumaður þess hluta er Arngrímur Gíslason, kirkjuvörður og vélstjóri. í garðinum eru um 276 þekktir legstaðir en unnið er að stækkun garðsins.

Fleiri myndir af Hafnarkirkju er að finna á myndasíðunni okkar sem er hér í flipunum að ofan eða á Fickr-síðunni okkar.